बाँके । बाँकेको डुडुवा गाउँपालिका– ६ असमानपुरमा रहेकाे जयन्दु बाल सुधार गृहभित्र थुनुवाहरुबीच बिहीबार राति झडप हुँदा एक जनाको मृत्यु भएको छ ।
झडपमा घाइते भएका रुपन्देहीका २० वर्षीय सुलभ केसीको मृत्यु भएको बाँकेका प्रहरी नायब उपरीक्षक नारायण डाँगीले बताए । जबर्जस्ती करणी मुद्दामा केसीलाई बाल सुधार गृहमा राखिएको थियाे ।
सुधार गृहभित्र समूह–समूह बनाएर भिड्नेमध्ये ११ जनालाई राति नै नियन्त्रणमा लिएर उपचारका लागि अस्पताल लगेको सुधार गृह प्रमुख विमला काउचाले बताइन् । २५५ थुनुवा रहेको उक्त बाल सुधार गृहबाट ९ जना सम्पर्कविहीन भएका छन् ।
बाल सुधार गृहमा १८ वर्षभन्दा माथिकालाई पनि राखिएको र उनीहरुलाई व्यवस्थापन गर्न नसक्दा उनीहरुले बेलाबेला प्रहरी इन्जार्जलाई पिट्ने गरेको बाल सुधार गृह स्रोतले जानकारी दिएको छ । साभार:ईकान्तिपुरबाट
