वीरगञ्ज। राष्ट्रिय मुक्ति क्रान्तिका संयोजक राजेन्द्र महतोले शासक वर्गको गलत नियतको कारण सातौं पटकको संविधान पनि असफल हुने ठोकुवा गरेका छन् ।
जनकपुरधाम विमानस्थलमा सोमबार सञ्चारकर्मीहरुसँग कुराकानी गर्दै पूर्वमन्त्रीसमेत रहेको संयोजक महतोले भने, ‘सम्पूर्ण नेपालीका लागि अहिलेसम्म संविधान नै बनेको छैन । आधा बढी नेपालीको प्रतिनिधिलाई बेवास्ता गरी जबरजस्ती संविधान जारी गरिएको थियो ।
यो सातौं संविधान पनि कुन दिन असफल हुन्छ, ठेगान छैन ।’ उनले व्यवस्था, संविधान र सरकार पटकपटक फेरिए पनि जनताको अवस्था नफेरिएको बताए । सरकार रहनु र नरहनुले जनतालाई कुनै फरक नपरेको भन्दै संयोजक महतोले अहिले बनेको सरकारले फरक नपरेको टिप्पणी गरे ।
उनले भने, ‘दुई ठूला दल आफ्नो स्वार्थ पूरा गर्न गठबन्धन सरकार बनाएको छ’, उनले भने, ‘यो गठबन्धनबाट कुनै उम्मिद छैन । सरकारको अनुभूति गर्न नसकेर जनता निराश छन् ।’ संघीय लोकतान्त्रिक गणतन्त्रको ब्यानर राम्रो भए पनि अन्तर विषयवस्तु बेइमानी तथा छलकपटपूर्ण रहेको उनले दाबी गरे ।
