पर्सा । सशस्त्र प्रहरी बल, नेपाल पर्साले विशेष सूचनाका आधारमा भारतबाट भन्सार छली गरी ल्याइएको झण्डै ९ लाख ५० हजार रुपैयाँ बराबरको कपडा र किराना सामग्री बरामद गरी भन्सार कार्यालयमा बुझाएको छ।
सशस्त्र प्रहरी बल, प्र.सी.सु. गुल्म बीरगंज र बीरगंज भन्सार कार्यालयबाट खटिएको संयुक्त टोलीले बीरगंज महानगरपालिका–१०, आदर्शनगरस्थित टाउनहल रोडमा रहेको BKC ईम्पेक्स नामक गोदाममा छापा मारी अवैध रूपमा भण्डारण गरी राखिएको रु. ६ लाख ५९ हजार ७ सय बराबरको तयारी कपडा बरामद गरेको हो।
साथै सशस्त्र प्रहरी बल, नेपाल बीओपी सिर्सियाबाट खटिएको अर्को टोलीले बीरगंज महानगरपालिका–१० को आदर्शनगर र छप्कैयाबाट भारतबाट भन्सार छली गरी ल्याउँदै गरिएको रु. २ लाख ७९ हजार १ सय ५ बराबरको कपडा तथा किराना सामग्री समेत बरामद गरेको छ।
बरामद गरिएका सबै सामानहरू आवश्यक कारबाहीका लागि बीरगंज भन्सार कार्यालयमा बुझाइएको सशस्त्र प्रहरी नायव उपरीक्षक तथा सूचना अधिकारी देवेन्द्र बहादुर सिंहले जानकारी दिएका छन्।
