वीरगञ्ज । वीरगञ्जस्थित नेपाल कावेरी एकेडेमीको प्रथम अलङ्करण समारोह सम्पन्न भएको छ ।
विद्यालयको विभिन्न पदमा नियुक्त भएका विद्यार्थीहरूलाई अलङ्करण गर्ने उद्देश्यका साथ आयोजित प्रथम अलङ्करण समारोह बुधवार सम्पन्न भएको हो ।
कार्यक्रमका प्रमुख अतिथि एवम् सशस्त्र प्रहरी बल नेपाल नम्बर १३ गणका प्रमुख प्रहरी उपरीक्षक (एसपी) सुमन थपलियाले विद्यार्थीहरूलाई समारोहमा अलङ्करण गरेका थिए ।
आगामी शैक्षिक सत्रका लागि नियुक्त विद्यालयका कप्तान, उप-कप्तान, खेलकुद कप्तान, अनुशासन, भाषा तथा हाउसका कप्तानहरूलाई एसपी थपलियाले अलङ्करण गरेको प्रधानाध्यापक विशाल साहुले जानकारी दिए ।
अलङ्करण पश्चात् कार्यक्रमलाई सम्बोधन गर्दै एसपी थपलियाले सानै उमेरमा विद्यालय व्यवस्थापनसँग सम्बन्धित विभिन्न जिम्मेवारी पाउँदा उनीहरूको नेतृत्व विकासमा ठूलो सहयोग हुने बताए । भविष्यमा देशको नेतृत्व गर्ने विद्यार्थीहरूको सर्वाङ्गीण विकासका लागि अन्य विद्यालयहरूले पनि यस्ता गतिविधिलाई प्राथमिकता दिनुपर्नेमा उनले बताए । उनले कडा परिश्रम गर्ने विद्यार्थीहरू जीवनमा कहिल्यै असफल नहुने बताए । ‘सफलताको सूत्र भनेकै बुद्धिको प्रयोग गर्दै इमानदारितापूर्वक कडा परिश्रम गर्नु हो,’ उनले भने ।
त्यस्तै शिक्षाविद् एवम् राजनीतिज्ञ डा. सुष्मा तिवारीले विद्यार्थीलाई उनीहरूले प्राप्त गरेको जिम्मेवारीका बारेमा जानकारी गराएकी थिइन् ।
कार्यक्रममा विद्यालयका निर्देशकहरू श्याम तुल्स्यान, सविता तुल्स्यान र आयुशी तुल्स्यान लगायतको उपस्थिति रहेको थियो ।
