बारा । बाराको जितपुरसिमरा उपमहानगरपालिका वडा नम्बर २२ स्थित ३ नम्बर पुल नजिक आज बिहान भएको सवारी दुर्घटनामा तीन जनाको मृत्यु भएको छ । घटनामा परी अन्य २७ जना घाइते भएका छन् ।
राति २ बजेको समयमा काकड्भिट्टाबाट काठमाडौंतर्फ आउँदै गरेको बा ३–००१ ख २५८७ नम्बरको बस र हेटौँडाबाट पथलैयातर्फ जाँदै गरेको ना ७ ख ७३०० नम्बरको ट्रक एक आपसमा ठोक्किँदा तीन जनाको मृत्यु भएको प्रहरीले जनाएको छ ।
दुर्घटनामा घाइते भएका तीन जनाको मकवानपुरको हेटौंडा अस्पतालमा उपचारको क्रममा मृत्यु भएको मकवानपुर प्रहरीले जनाएको छ । मृत्यु हुनेमा ट्रक चालक तनहुँ घर भएका २८ वर्षीय पूर्ण गुरुङ, मकवानपुरको हेटौँडाका बस चालक ४० वर्षीय हरि शमशेर सुयाल थापा र अर्का एकजना व्यक्तिको सनाखत हुन बाँकी रहेको प्रहरीले जनाएको छ ।
घाइतेमध्ये सात जनाको अवस्था गम्भीर रहेकोले उपचारका लागि चितवनस्थित मेडिकल कलेज पठाइएको र सामान्य घाइते भएका २० जनाको हेटौँडाका विभिन्न अस्पतालमा उपचार भइरहेको छ ।
