वीरगंज । “आर्थिक समृद्धिको आधार, लघु उद्यममार्फत रोजगार” भन्ने मूल नाराका साथ वीरगंजमा ४५ दिने ह्याण्ड इम्ब्रोडरी सम्बन्धी सीपमुलक तालिम सम्पन्न भएको छ ।
गरिबी निवारणका लागि लघु उद्यम विकास कार्यक्रम अन्तर्गत महानगरपालिकाको आयोजनामा वडा नं. ३० लालपर्सामा तालिम संचालन भएको थियो ।
कार्यक्रम विशेषगरी स्थानीय महिलाहरूलाई लक्षित गरी स्वरोजगार, सिप विकास र आर्थिक सशक्तीकरणको उद्देश्यले सञ्चालन गरिएको थियो।
शुक्रबार आयोजित तालिम समापन समारोहमा प्रमुख अतिथि वीरगंज महानगरका प्रमुख राजेशमान सिंहले सहभागी महिलाहरूलाई प्रमाणपत्र वितरण गर्दै तालिमको प्रभावकारिताबारे उल्लेख गरे।
उनले भने, “महिला दिदीबहिनीहरूलाई सशक्त बनाउने हाम्रो लक्ष्य हो। यस्ता सिपमूलक तालिमहरूले उनीहरूलाई आत्मनिर्भर बनाउन सहयोग पुर्याउँछ। ह्याण्ड इम्ब्रोडरी जस्तो सिपले घरमै बसेर आम्दानी गर्न सकिने सम्भावना उच्च छ।”
त्यसैगरी, महानगरका प्रमुख प्रशासकीय अधिकृत अरविन्द लाल कर्णले पनि कार्यक्रमको प्रशंसा गर्दै स्थानीय तहबाट सञ्चालित यस्ता सिप विकास कार्यक्रमहरू सामाजिक रुपान्तरणको माध्यम बन्न सक्ने बताए। “सिप सिकेर महिलाहरू आत्मनिर्भर बन्ने मात्र होइन, आफ्नो सीप अरूलाई पनि सिकाउने क्षमता राख्न थाल्नेछन्,” कर्णले भने, “ह्याण्ड इम्ब्रोडरीले घरेलु उत्पादनको माध्यमबाट स्वरोजगारको सम्भावना खोल्नेछ।”
तालिममा सहभागी महिलाहरूले ह्याण्ड इम्ब्रोडरी सम्बन्धी विविध डिजाइन, कपडामा कलात्मक कढाई गर्ने सीप, र बजारमा कसरी आफै उत्पादन बेच्ने भन्ने विषयमा प्रशिक्षण लिएका थिए। उनीहरूले तालिमले आफूहरूमा आत्मविश्वास र सीप दुवै अभिवृद्धि गरेको प्रतिक्रिया दिएका छन्।
महानगरपालिकाले यस्ता सिपमूलक कार्यक्रमलाई नगरका अन्य वडाहरूमा पनि विस्तार गर्ने योजना बनाएको छ। कार्यक्रमको माध्यमबाट महिलाहरूले साना उद्यम स्थापना गरी आफ्नो आर्थिक हैसियत उकास्न सक्ने अपेक्षा गरिएको छ।
समापन कार्यक्रममा वडा नं. ३० का वडाध्यक्ष मनोज यादव, महानगरपालिकाका आर्थिक विकाश महाशाखा प्रमुख राजकृष्ण ताम्राकार, महानगर प्रमुखका राजनीतिक सल्लाहकार उमेशलाल सहनी लगायतको सहभागिता रहेको थियो ।
