वीरगंज । ट्राफिक सप्ताहको अवसरमा ब्राइट पब्लिक स्कूलका विद्यार्थीहरूले सडक सुरक्षाप्रति जनचेतना अभिवृद्धि गर्न सक्रिय भूमिका निर्वाह गरेका छन्। उनीहरूले विभिन्न सचेतनामूलक कार्यक्रममार्फत ट्राफिक नियमहरूको पालना गर्न सबैमा अपिल गरेका छन्।
विद्यार्थीहरूले प्लेकार्ड तथा जनचेतनामूलक प्रस्तुतीमार्फत ट्राफिक नियमको महत्व दर्शाए। “सुरक्षित यातायात, सबैको अधिकार” भन्ने मूल नाराका साथ सहभागीहरूले ट्राफिक नियम पालना गर्नु प्रत्येक नागरिकको कर्तव्य तथा जिम्मेवारी रहेको स्पष्ट पारे।
विद्यालयका प्रतिनिधिहरूले भने, “सडकमा हिँड्दा, सवारी चलाउँदा वा पैदल यात्रा गर्दा ट्राफिक नियमहरूको पालना गर्नु केवल कानुनी आवश्यकता मात्र होइन, सामाजिक र नैतिक दायित्व पनि हो। यसले हामीलाई अनुशासन, समयको मूल्य र अरूप्रति उत्तरदायित्व सिकाउँछ।”
ट्राफिक नियम उल्लङ्घन गर्दा हुने दुर्घटना क्षणिक लापरवाहीले सिर्जिने गम्भीर परिणाम हुन सक्ने भएकाले विद्यार्थीहरूले हेलमेट, सिट बेल्ट, गति सीमा, सिग्नल बत्ती तथा जेब्राक्रसको पालना गर्नुपर्नेमा जोड दिएका थिए।
विद्यार्थीहरूले “यातायात सुरक्षाको सुरुआत आफैंबाट गरौं, जिम्मेवार नागरिक बनौं” भन्ने सन्देश दिँदै ट्राफिक नियम पालना गर्न सबैलाई आह्वान गरेका छन्।
सप्ताहव्यापी कार्यक्रममार्फत विद्यार्थीहरूले सुरक्षित यातायात संस्कृति निर्माणमा आफ्नो सशक्त भूमिका प्रस्तुत गरेका छन्।
