वीरगञ्ज । वीरगञ्ज महानगरपालिका–२२ स्थित ड्राइपोर्ट सडकखण्ड अन्तर्गत सिताराम चोकमा शुक्रबार बिहान भएको सवारी दुर्घटनामा दुई युवाको मृत्यु भएको छ भने एक जना गम्भीर घाइते भएका छन्।
मृत्यु हुनेमा पर्सा जिल्लाको छिपहरमाई गाउँपालिका–३ झलमहिया निवासी २३ वर्षीय रामाकान्त यादव र सोही ठाउँका २३ वर्षीय विजय यादव रहेका छन्।
शुक्रबार बिहान करिब ५ बजे बिग्रिएर सडकको छेउमा रोकिने क्रममा राखिएको भारतीय नम्बर प्लेटको ट्रक (एचआर ५५ के ३९७१) मा सिर्सिया बाट ड्राइपोर्टतर्फ गइरहेको प्रदेश ३ को मोटरसाइकल (बा.प्र. ०३–००४ प ८६१२) पछाडिबाट ठोक्किँदा दुर्घटना भएको थियो।
मोटरसाइकलमा सवार तीनै जना गम्भीर घाइते भएका थिए। उपचारका लागि नारायणी अस्पताल लगिएकोमा रामाकान्त यादव र विजय यादवको मृत्यु भएको जिल्ला प्रहरी कार्यालय पर्साका प्रहरी नायब उपरीक्षक (डीएसपी) किशोर लम्सालले जानकारी दिए।
घाइते अर्का युवक २२ वर्षीय विजयकुमार यादवको सोही अस्पतालमा उपचार भइरहेको छ। उनको टाउको र शरीरका विभिन्न भागमा गम्भीर चोट लागेको छ।
दुर्घटनापछि ट्रक चालक फरार भएका छन् भने उनको खोजी भइरहेको प्रहरीले जनाएको छ।
