सशस्त्र प्रहरी बल पर्साद्वारा १० हजार ब्रोइलर कुखुराका चल्ला नष्ट

By Rato Pana

पुस २०, २०८२

वीरगञ्ज । सशस्त्र प्रहरी बल नेपाल नं. १३ गण हे.क्वा. पर्साले भारतबाट अवैध रूपमा चोरी पैठारी गरी नेपालतर्फ ल्याइँदै गरेको ब्रोइलर कुखुराका १० हजार गोटा चल्ला नियन्त्रणमा लिई नष्ट गरेको छ।

आज (आइतबार) सशस्त्र प्रहरी बल नं. १३ गण हे.क्वा. पर्साबाट खटिएको टोलीले पर्साको जगरनाथपुर गाउँपालिका–५, मसियानी क्षेत्रबाट ९ जना व्यक्तिले टाउकोमा बोकी नेपालतर्फ ल्याउँदै गरेको करिब ५ लाख रुपैयाँ मूल्य बराबरको प्रतिबन्धित ब्रोइलर कुखुराका चल्ला नियन्त्रणमा लिएको हो।

नियन्त्रणमा लिइएका चल्लाहरू आवश्यक कानुनी प्रक्रिया पूरा गरी नेपाल प्रहरी, स्थानीय जनप्रतिनिधि, सञ्चारकर्मी तथा क्वारेन्टाइन कार्यालयका प्रतिनिधिहरूको रोहबरमा सशस्त्र प्रहरी बल नं. १३ गण परिसरभित्र नष्ट गरिएको सशस्त्र प्रहरीले जनाएको छ।