वीरगंज । मेटाले आफ्नो सामाजिक सञ्जाल फेसबुकमा स्थापित क्रियटरहरूलाई आकर्षित गर्न ‘क्रियटर फास्ट ट्र्याक’ नामक नयाँ कार्यक्रम सार्वजनिक गरेको छ। TikTok (टिकटक) र YouTube (युट्युब) जस्ता प्रतिस्पर्धी प्लेटफर्ममा पहिले नै ठूलो दर्शक समूह बनाएका क्रियटरहरूलाई फेसबुकमा छिटो स्थापित गराउने र आम्दानी बढाउने उद्देश्यले यो कार्यक्रम ल्याइएको हो।
नयाँ प्लेटफर्ममा शून्यबाट सुरु गर्नुपर्ने समस्यालाई समाधान गर्न यो योजना तयार गरिएको हो। कार्यक्रममा सहभागी हुने क्रियटरहरूले आफ्ना रिल्समा बढी पहुँच पाउनेछन्, जसले उनीहरूको फलोअर्स छिटो बढाउन मद्दत गर्नेछ। साथै, योग्य रिल्स पोस्ट गरेबापत तीन महिनासम्म निश्चित आम्दानीको सुनिश्चितता पनि गरिनेछ।
यस योजनाअन्तर्गत अन्य प्लेटफर्ममा रहेको फलोअर्स सङ्ख्याका आधारमा मासिक आम्दानी निर्धारण गरिएको छ। कम्तीमा एक लाख फलोअर्स भएका क्रियटरले प्रति महिना १,००० अमेरिकी डलरसम्म कमाउन सक्नेछन् भने एक मिलियनभन्दा बढी फलोअर्स भएका क्रियटरले प्रति महिना ३,००० डलरसम्म आम्दानी गर्न सक्नेछन्।
कार्यक्रमको अर्को विशेषता भनेको ‘कन्टेन्ट आम्दानी’ सम्बन्धी उपकरणमा सिधै पहुँच हो। सामान्य मापदण्ड पूरा नगरे पनि क्रियटरहरूले यो सुविधा प्रयोग गर्न पाउनेछन्, जसले कार्यक्रम सकिएपछि पनि उनीहरूलाई निरन्तर कमाइ गर्न सहयोग पुर्याउनेछ।
क्रियटर अर्थतन्त्रमा फेसबुकले लगानी पनि बढाउँदै लगेको छ। सन् २०२५ मा मात्र कम्पनीले करिब ३ अर्ब डलर क्रियटरहरूलाई भुक्तानी गरेको थियो, जुन अघिल्लो वर्षभन्दा ३५ प्रतिशत बढी हो। तीमध्ये ६० प्रतिशत आम्दानी रिल्सबाट आएको थियो भने बाँकी रकम स्टोरी, फोटो र टेक्स्ट सामग्रीबाट आएको थियो।
क्रियटरहरूको आम्दानी र सामग्रीको प्रदर्शन बुझ्न सहज बनाउन फेसबुकले नयाँ मापन प्रणाली पनि ल्याएको छ। ‘योग्य भ्युज’ ले आम्दानीका लागि मान्य भ्युज देखाउनेछ भने ‘आम्दानी दर’ ले प्रति १,००० भ्युजमा हुने सम्भावित कमाइ जनाउनेछ। ‘अयोग्य भ्युज’ मार्फत किन केही भ्युज आम्दानीमा नपरे भन्ने जानकारी पनि प्राप्त गर्न सकिनेछ।
अब फेसबुकले मौलिक सामग्री, राम्रो सहभागिता र लामो समयसम्म हेरिने भिडियोहरूलाई प्राथमिकता दिने जनाएको छ।
कसरी सहभागी हुने ?
यो कार्यक्रम निमन्त्रणामा आधारित छ। इच्छुक क्रियटरहरूले फेसबुक मोबाइल एपको ‘प्रोफेसनल ड्यासबोर्ड’मा गई ‘आम्दानी’ सम्बन्धी खण्डमा रहेको ‘कन्टेन्ट आम्दानी’ विकल्पभित्र ‘रुचि फारम’ भरेर आवेदन दिन सक्नेछन्।
फेसबुकका क्रियटर प्रोडक्ट उपाध्यक्ष याइर लिभ्नेका अनुसार यो कार्यक्रम विशेषगरी नयाँ प्लेटफर्ममा समुदाय निर्माण गर्न कठिनाइ भोग्ने स्थापित क्रियटरहरूको समस्या समाधान गर्न केन्द्रित गरिएको हो।
