काठमाडाैँ । सत्ता गठबन्धन छाडेर एमालेसँग चुनावी तालमेल गरेको जनता समाजवादी पार्टीका मन्त्रीहरुलाई प्रधानमन्त्री शेरबहादुर देउवाले हटाउने तयारी गरेका छन् ।
कांग्रेस सभापति समेत रहेका प्रधानमन्त्री देउवाले आजै दिउँसो सत्ता गठबन्धनका शीर्ष नेताहरुलाई यसबारे छलफल गर्न बालुवाटारमा बोलाएका छन् । गठबन्धन दलका नेताहरुले पनि विपक्षी दललाई सरकारमा सहभागि गराउनु उपर्युक्त नहुने भन्दै हटाउनुपर्नेमा जोड दिदै आएका छन् ।
जसपाले एमालेसँगको चुनावी सहकार्यलाई पछिसम्म नै जारी राख्ने बताएपछि गठबन्धन दलका शीर्ष नेताहरु जसपाका मन्त्रीहरुलाई हटाउनुपर्नेमा जोड दिन थालेका हुन् । गठबन्धन सरकारमा रहेको जसपाले एमालेसँग १४ जिल्लामा तालमेल गरेको छ ।
देउवा सरकारमा जसपाबाट संघीय मामिला तथा सामान्य प्रशासनमन्त्री राजेन्द्र श्रेष्ठ, भौतिक पूर्वाधारमन्त्री मोहम्मद इस्तियाक राई, वन तथा वातवरणमन्त्री प्रदीप यादव र कृषि तथा पशुपक्षीमन्त्री मृगेन्द्रकुमार सिंह छन् । तर, जसपाका मन्त्रीहरुलाई हटाएपनि निर्वाचन आचारसंहिताका कारण नयाँ नियुक्ति गर्न भने नपाइने आयोगले बताएको छ ।
देउवाले २०७४ को निर्वाचनमा समेत माओवादी केन्द्रले एमालेसँग तालमेल गरेपछि मन्त्रीहरुलाई विनाविभागीय बनाएका थिए ।
