पर्सा । अख्तियार दुरुपयोग अनुसन्धान आयोग, टंगाल काठमाडौँबाट खटिएको टोलीले बहुदरमाई नगरपालिकाका निमित्त प्रमुख प्रशासकीय अधिकृत अजय कुमार श्रीवास्तवलाई पक्राउ गरेको छ।
आयोगका अनुसार श्रीवास्तवले पोखरिया नगरपालिका र बहुदरमाई नगरपालिकामा संचालन भइरहेका योजनाहरूको स्वीकृति, खरिद आदेश तथा ठेक्का प्रक्रिया जस्ता काममा अनियमितता गर्दै घुस माग्ने र लिने कार्यमा संलग्न रहेको पाइएको हो।
आयोगका एक अधिकृतले जानकारी दिँदै भने, “श्रीवास्तवले सार्वजनिक पदको दुरुपयोग गरी व्यक्तिगत लाभ लिने उद्देश्यले गैरकानुनी रूपमा रकम मागेको र लिएको पुष्टि अनुसन्धानबाट भएको छ।”
उनीमाथि प्रारम्भिक अनुसन्धान सम्पन्न भइसकेको र हाल आवश्यक कानुनी प्रक्रिया अघि बढाइएको अख्तियारले जनाएको छ।
साथै, आयोगले भ्रष्टाचारविरुद्ध शून्य सहनशीलताको नीति अनुरूप यस्ता गतिविधिमा संलग्न जो–कोहीमाथि कडाइका साथ कारबाही गरिने चेतावनीसमेत दिएको छ।
