वीरगन्ज । जनकपुरधाममा चल्दै आएको नेपाल बार एसोसिएसन र नेपाल पत्रकार महासंघबीचको जग्गा विवाद अन्ततः आपसी सहमतिमा समाधान भएको छ।
उच्चस्तरीय वार्ता समितिको पहलमा मंगलबार भएको मिलापत्रअनुसार, गुठी संस्थानबाट लिजमा लिइएको जग्गा दुबै संस्थाले बाँडफाँट गरी प्रयोग गर्ने भएका छन्। बार एसोसिएसनले पार्किङका लागि उपयोग गर्नेछ भने पत्रकार महासंघले बहुउद्देश्यीय भवन निर्माण गर्नेछ।
दुवै संस्थाका अध्यक्षहरूले हस्ताक्षर गरेको सहमतिपत्रमा एकअर्काविरुद्धको कानुनी कारबाही फिर्ता लिने, सामाजिक सञ्जालमा आलोचनात्मक सामग्री पोस्ट नगर्ने र पेशागत मर्यादा कायम राख्दै सहकार्य गर्ने प्रतिबद्धता गरिएको छ।
यस सहमति सम्भव बनाउन दुबै पक्षका वरिष्ठ अधिवक्ता तथा पत्रकार महासंघका प्रतिनिधिहरू सम्मिलित वार्ता समितिको महत्वपूर्ण भूमिका रहेको थियो। यो सहमति पेशागत संस्थाबीच संवादमार्फत विवाद समाधान गर्न सकिने उदाहरणका रूपमा प्रस्तुत भएको छ।
