वीरगञ्ज । बालकले के गर्न सक्छन् भन्ने धारणालाई चकित पार्ने गरि वीरगञ्जका निब् सरावगीले लोकप्रिय घोरेपानी पूँनहिल (३२१० मिटर) ट्रेक सफलतापूर्वक पूरा गरेका छन्। २०२५ अक्टोबर २४–२७ सम्म चलेको चारदिने यात्राले उनी केवल ट्रेकरत बालक भएर होइन, अदम्य साहस बोकेका यात्रुका रूपमा पहिचान बनाएका छन्।
सामान्य ट्रेकरले पनि ‘मध्यम कठिन’ ठहराउने यो मार्ग बालबालिकाका लागि भने थप चुनौतीपूर्ण मानिन्छ । चिसो, लगातार उकालो, साँघुरा बाटा र हजारौँ ढुंगाका सिँढी तर निब्ले यी सबै चुनौतीहरूलाई थकान होइन, उत्साहको मुस्कानसहित सामना गरे।
नेपालकै मरवारी समुदायमा कम उमेरमै पूँनहिल आरोहण गर्ने ट्रेकरमध्ये उनी अब अग्रपंक्तिमा छन्। मार्गभरि विदेशी पर्यटकसम्म उनको उमेर देखेर अचम्म, र क्षमताले प्रभावित बने। ट्रेक गाइडहरू भन्छन्, “निब्ले देखाएको धैर्य र अनुशासनले हामी नै हौसियौँ।”
परिवारका सदस्यले सुनाएअनुसार निब्ले पहिलो दिनको लामो उकालो सहजै पार गरे। दोस्रो दिन भने बिहान ४ बजे उठेर पूँनहिलको शिखरसम्म पुगे, जहाँ सूर्योदयसँगै उनको अनुहारमा देखिएको उत्साहले अरू ट्रेकर पनि उत्साहित भए।
आमा नूतन सरावगी भन्छिन्,
“उनले समुदाय मात्र होइन, सबै बालबालिकालाई “साहस उमेरले होइन, मनले मापन हुन्छ” भन्ने देखाइदिएका छन् ।
वीरगञ्जमा निब्को सफलतालाई खुशी र गर्वका साथ स्वागत गरिएको छ। स्थानीय विद्यालयहरू उनलाई प्रेरणादायी ‘बाल पर्वतारोही’ का रूपमा हेर्न थालेका छन्। शिक्षकहरू भन्छन्, “यस्ता साहसिक अनुभवले बालबालिकामा प्रकृतिप्रेम, फिटनेस र आत्मविश्वास जगाउन ठूलो भूमिका खेल्छ।”
पर्यटन क्षेत्रका विज्ञहरूका अनुसार यस्ता उपलब्धिहरूले परिवारहरूलाई पनि साहसिक यात्रामा बालबालिका सहभागी गराउन प्रेरित गर्छन्, जसले देशकै आन्तरिक पर्यटनलाई बलियो बनाउँछ।
निब् सरावगीको सानै उमेरको यो यात्रा अब सफलताभन्दा बढी एक प्रेरणा बनेको छ, “उमेर होइन, उमंगले उचाइ छुन सकिन्छ।”
