वीरगञ्ज। जेनजी युवा अभियन्ताहरूले सुरु गरेको नदी संरक्षण अभियानको पाँचौँ सातामा आज रानीघाटबाट श्रीसिया नदीको कालो तथा विषाक्त पानी बोतलमा संकलन गरी वीरगञ्जबाट जीतपुरसिमरा उपमहानगरपालिकाका प्रमुख माननीय राजन पौडेलसम्म पुर्याएका छन् । यस अभियानको नेतृत्व किसन सर्राफले गरेका छन्।
अभियानमा सहभागी युवाहरूले नदीको दैनिकी अवस्था प्रत्यक्ष हेरेर जनचेतना फैलाउने प्रयास गरेका छन्। उनीहरूले नदीको पानी प्रदूषित भइरहेको तथ्य देखाउँदै स्थानीय प्रशासन र जनतालाई सचेत रहन आग्रह गरेका छन्।
अभियन्ताहरूले चेतावनी दिँदै भने, “सचेत रहनुहोस् भोलिको दिनमा हामी तपाईंहरूको कार्यकक्षसम्म पनि पुग्न सक्छौं।” अभियानले नदी प्रदूषण, सरसफाइ, र जलस्रोत संरक्षणको महत्त्वबारे समुदायमा जनचेतना सिर्जना गर्ने उद्देश्य राखेको छ।
सर्राफका अनुसार, “नदीको जीवन बचाउन हामी सबैको सहयोग आवश्यक छ।” अभियानमा विद्यार्थी, समाजसेवी, र विभिन्न युवा संगठनका सदस्यहरू पनि सक्रिय सहभागी भएका छन्।
यसरी जेनजी युवा अभियन्ताहरूले नदी संरक्षण र प्रदूषण नियन्त्रणको संदेश जनसमुदायसम्म पुर्याउने अभियानलाई निरन्तरता दिइरहेका छन्।
