वीरगञ्ज। भोजपुरी साहित्यमा नयाँ प्रतिभालाई प्रोत्साहित गर्ने उद्देश्यसहित लेखक तथा साहित्यकार दिनेश गुप्ताले ‘दिनेश गुप्ता प्रतिभा पुरस्कार’ स्थापना गर्ने घोषणा गरेका छन्।
भोजपुरी, नेपाली र हिन्दी भाषामा करिब एक दर्जन पुस्तक प्रकाशित गरिसकेका गुप्ताका अनुसार, यो पुरस्कार भोजपुरी साहित्यमा सक्रिय लेखक तथा कविहरूलाई नयाँ प्लेटफर्म प्रदान गर्ने र उनीहरूको सिर्जनात्मक प्रतिभा उजागर गर्ने लक्ष्य राखेर सुरु गरिएको हो।
पुरस्कारको महत्वबारे बोल्दै गुप्ताले साहित्यले आफूलाई दिएको पहिचानप्रति कृतज्ञता व्यक्त गर्दै यो पहल साहित्यप्रतिको ऋण तिर्ने सानो प्रयास भएको बताए। उनले पुरस्कारलाई भोजपुरी साहित्यमा योगदान दिने लेखक र कविहरूप्रति आफ्नो प्रेमपूर्ण उपहारको रूपमा उल्लेख गरे।
गुप्ताका अनुसार, यस पुरस्कारमार्फत समाजलाई नयाँ दृष्टिकोण दिने र लेखनमा सक्रिय भए पनि व्यापक मान्यता नपाएका लेखक तथा कविहरूलाई प्रोत्साहित गर्ने लक्ष्य राखिएको छ। यसले नवप्रतिभालाई आफ्नो सिर्जना प्रस्तुत गर्ने अवसर दिन्छ र साहित्यिक संसारमा पहिचान बनाउन सहयोग पुर्याउँछ।
पुरस्कारको छनोट प्रक्रिया पारदर्शी र निष्पक्ष हुने गुप्ताले जानकारी दिए। विजेताहरूको छनोट तीन सदस्यीय साहित्यिक विद्वानहरूको टोलीले गर्नेछ, जसमा स्वयं गुप्ता पनि सहभागी हुनेछन्। मूल्यांकन लेखनको गहिराइ, नवीनता, सामाजिक सन्देश र संवेदनशीलताको आधारमा गरिनेछ।
साहित्यकार र पाठकवर्गबीच यस पुरस्कारप्रति उत्साह बढ्दै गएको गुप्ताले बताए। उनले फागुन महिनाभित्र पुरस्कारको औपचारिक शुभारम्भ गरिने जानकारी समेत दिए। उनले विश्वास व्यक्त गरे कि यस प्रकारका पहलहरूले भोजपुरी साहित्यमा नयाँ ऊर्जा थप्नेछ।
