वीरगंज । पर्सा निर्वाचन क्षेत्र नम्बर–१ मा नेपाली कांग्रेसका उम्मेदवार अनिल रुंगटाको चुनावी अभियान रोजगारी केन्द्रित नारासँगै अघि बढिरहेको बेला उनका व्यवहार र प्रतिबद्धताबीच अन्तर रहेको भन्दै प्रश्नहरू उठ्न थालेका छन्। घरदैलो कार्यक्रममा “नेपाली युवालाई स्वदेशमै रोजगारी” दिने प्रतिबद्धता दोहोर्याइरहेका रुंगटामाथि आफ्नै उद्योगहरूमा नेपालीभन्दा भारतीय कामदारलाई प्राथमिकता दिएको आरोप सार्वजनिक भएको हो।
स्थानीय स्रोत तथा श्रम कार्यालयसँग सम्बन्धित व्यक्तिहरूको भनाइ उद्धृत गर्दै आएका आरोपअनुसार रुंगटाको स्वामित्वमा रहेको उद्योग मा अधिकांश मजदुर भारतीय नागरिक रहेको दाबी गरिएको छ। यद्यपि, यी आरोपबारे उम्मेदवार रुंगटा वा उद्योग व्यवस्थापनको तर्फबाट हालसम्म कुनै औपचारिक प्रतिक्रिया आएको छैन।
स्थानीय युवाहरू भने उद्योगसम्म पुगेर पनि अवसर नपाएको गुनासो गर्छन्। उनीहरूको भनाइ अनुसार नेपाली कामदारलाई अस्थायी प्रकृतिको काम र न्यून ज्यालामा सीमित राखिने, जबकि भारतीय कामदारलाई दीर्घकालीन रूपमा प्राथमिकता दिइने गरिएको छ। तर यी दाबीहरूको स्वतन्त्र र आधिकारिक पुष्टि भने हुन बाँकी छ।
चुनावी भाषणमा उठाइने नाराहरू र व्यवहारमा देखिने अभ्यासबीचको यही अन्तरले पर्सा–१ मा राजनीतिक बहस थप तातेको छ। आलोचकहरू यसलाई ‘दोहोरै मापदण्ड’ को उदाहरण भन्दै उम्मेदवारको प्रतिबद्धतामाथि प्रश्न गरिरहेका छन्—रोजगारीको कुरा भाषणमै सीमित हो कि व्यवहारमा पनि देखिन्छ?
उता, रुंगटाका समर्थकहरू भने यस्ता आरोपलाई चुनावी मौसममा फैलाइने राजनीतिक हल्ला मात्र भएको दाबी गर्दै आएका छन्। उनीहरूको भनाइमा यी आरोपहरू प्रतिस्पर्धी शक्तिहरूको योजनाबद्ध प्रचार हुन सक्छन्।
निर्वाचन नजिकिँदै जाँदा रोजगारी, युवा पलायन र उद्योगमा स्थानीयको पहुँचजस्ता मुद्दा पर्सा–१ का मतदाताबीच केन्द्रीय बहसको विषय बन्दै गएका छन्।
