वीरगञ्ज । वीरगञ्जमा गौतम बुद्ध को २५७०औँ बुद्ध जयन्ती उत्सव यसपटक शान्ति, सहिष्णुता र एकताको सन्देशसँगै विशेष उत्साहका साथ सम्पन्न भएको छ। शहरका विभिन्न समुदायलाई एकै थलोमा जोड्दै आयोजित कार्यक्रममा विद्यार्थीदेखि सर्वसाधारणसम्मको उल्लेखनीय सहभागिता देखिएको थियो।
वीरगञ्ज बौद्ध समिति को आयोजनामा भएको कार्यक्रम बुद्ध वन्दना र त्रिशरण मन्त्रबाट सुरु भएको थियो। त्यसपछि माइस्थानबाट सुरु गरिएको शान्ति र्याली शहरका प्रमुख मार्गहरू पार गर्दै भिसुवा डाँडामा पुगेर समापन गरिएको आयोजकले जानकारी दिएको छ। र्यालीभरि सहभागीहरूले शान्ति र मानवताको पक्षमा सन्देशमूलक नाराहरू प्रस्तुत गरेका थिए।
कार्यक्रममा डा. दीपक शाक्य प्रमुख अतिथिका रूपमा सहभागी हुँदै बुद्धका शिक्षाले आजको द्वन्द्वग्रस्त विश्वलाई सही दिशा दिन सक्ने धारणा व्यक्त गरे। उनका अनुसार करुणा, मैत्री र मध्यम मार्गको अभ्यासले मात्र समाजमा दीगो शान्ति स्थापना सम्भव छ। उनले बुद्धलाई कुनै एक धर्ममा सीमित नभई सम्पूर्ण मानवताका मार्गदर्शकका रूपमा व्याख्या गरे।
कार्यक्रम संयोजक रुपेश मानन्धरको अध्यक्षतामा सम्पन्न समारोहमा समाजसेवी, शैक्षिक क्षेत्रका प्रतिनिधि तथा विभिन्न संघसंस्थाका व्यक्तिहरूको उपस्थिति रहेको थियो। कार्यक्रममा वक्ताहरूले बुद्ध जयन्ती जस्ता अवसरले समाजमा सहिष्णुता र आपसी सद्भावलाई अझ बलियो बनाउने विश्वास व्यक्त गरेका थिए।
समग्रमा, वीरगञ्जमा मनाइएको बुद्ध जयन्ती केवल धार्मिक उत्सवमा सीमित नभई सामाजिक एकता र शान्तिको सन्देश फैलाउने महत्वपूर्ण अवसरका रूपमा स्थापित भएको देखिएको छ।
