वीरगञ्ज । पर्साको वीरगञ्ज महानगरपालिका–२३ स्थित पूर्वाधार विकास कार्यालयको बोर्डमा मोबिल छर्केर फरार भएका दुई जनालाई प्रहरीले पक्राउ गरेको छ।
जिल्ला प्रहरी कार्यालय पर्साका अनुसार आज बिहान करिब ९:२० बजे कार्यालयका कर्मचारी राम प्रवेश यादवसँग विकास योजनाको विषयमा विवाद भएपछि उनीहरूले कार्यालय परिसरमा रहेको बोर्डमा मोबिल छर्की भागेका थिए।
घटनाबारे कार्यालय प्रमुखले दिउँसो करिब २:३० बजे वडा प्रहरी कार्यालय श्रीपुरमा टेलिफोनमार्फत जानकारी गराएपछि प्रहरी टोली परिचालन भई संलग्न व्यक्तिहरूलाई नियन्त्रणमा लिइएको हो।
पक्राउ पर्नेहरूमा वीरगञ्ज महानगरपालिका–११ निवासी ३३ वर्षीय जयपुजन ठाकुर लोहार र वडा नं. १३ राधेमाई निवासी ३० वर्षीय मनमोहन पाण्डे रहेका छन्। उनीहरूमाथि थप अनुसन्धान भइरहेको जिल्ला प्रहरी कार्यालय पर्साका प्रहरी नायब उपरीक्षक तथा सूचना अधिकारी राज कार्कीले जानकारी दिएका छन्।
