वीरगञ्ज। वीरगञ्जस्थित नारायणी अस्पतालमा उपचारका क्रममा एक बिरामीको मृत्यु भएपछि अस्पताल प्रशासनको कार्यशैलीमाथि पुनः गम्भीर प्रश्न उठेको छ। घटनापछि पाँच सदस्यीय छानबिन समिति गठन गरिएको छ भने उपचारमा संलग्न पाँच स्वास्थ्यकर्मीलाई छानबिन सम्पन्न नभएसम्मका लागि जिम्मेवारीबाट अलग गरिएको छ।
वीरगञ्ज महानगरपालिका–२५ निवासी ४५ वर्षीय राजकुमार पटेलको शनिबार आकस्मिक कक्षमा उपचारका क्रममा मृत्यु भएपछि उनका आफन्त तथा स्थानीयवासीले चिकित्सक र अस्पताल प्रशासनको लापरबाहीका कारण बिरामीको ज्यान गएको आरोप लगाउँदै अस्पताल परिसरमा विरोध प्रदर्शन गरेका थिए। प्रदर्शन चर्किएपछि केही समय अस्पतालको अवस्था तनावग्रस्त बनेको थियो।
स्थानीय प्रशासन, नारायणी अस्पतालका निमित्त मेडिकल सुपरिटेन्डेन्ट डा. चितरञ्जन साह, पीडित परिवार तथा जनप्रतिनिधिबीच भएको छलफलपछि घटनाको निष्पक्ष छानबिन गर्न समिति गठन गर्ने सहमति भएको हो। समितिलाई सात दिनभित्र प्रतिवेदन बुझाउने जिम्मेवारी दिइएको छ। समितिको प्रतिवेदनका आधारमा आवश्यक कानुनी तथा प्रशासनिक प्रक्रिया अघि बढाइने जनाइएको छ।
घटनाका बेला आकस्मिक कक्षमा कार्यरत डा. प्रमोद राम, डा. राम किशोर सिंह, प्रहलाद प्रसाद, नरेश कुमार चौधरी र आस्था यादवलाई छानबिन नसकिँदासम्मका लागि जिम्मेवारीबाट अलग गरिएको अस्पताल प्रशासनले जनाएको छ।
मृतकका परिवारले अक्सिजन सपोर्टमा रहेका बिरामीलाई अर्को स्थानमा सार्ने क्रममा अक्सिजन हटाइएकाले बिरामीको अवस्था थप गम्भीर भई मृत्यु भएको आरोप लगाएका छन्। यद्यपि उक्त आरोपको आधिकारिक पुष्टि भइसकेको छैन र छानबिन समितिले त्यसबारे अध्ययन गर्नेछ।
यस घटनासँगै नारायणी अस्पतालका निमित्त मेडिकल सुपरिटेन्डेन्ट डा. चितरञ्जन साहको नेतृत्वमाथि पनि प्रश्न उठ्न थालेको छ। उनी तेस्रो पटक निमित्त मेसुको जिम्मेवारीमा रहे पनि अस्पतालमा पटक–पटक विवाद, सेवाप्रवाहमा देखिने कमजोरी र व्यवस्थापनसम्बन्धी गुनासाहरू दोहोरिँदै आएको भन्दै स्थानीय तहमा असन्तुष्टि बढ्दै गएको छ।
अस्पतालसँग सरोकार राख्ने केही स्थानीय तथा सेवाग्राहीहरूले डा. साहको नेतृत्वमा समस्याको दीर्घकालीन समाधानभन्दा विवाद साम्य पार्ने प्रयास बढी हुने गरेको आरोप लगाउने गरेका छन्। उनीहरूले अस्पतालको व्यवस्थापन कमजोर बन्दै गएको, सेवाग्राहीप्रति संवेदनशीलता घटेको र जनविश्वासमा असर परेको दाबी गरेका छन्।
यस्तै, डा. साह आफ्नै स्वामित्वमा निजी अस्पताल सञ्चालन गर्ने र सरकारी अस्पतालमा प्रत्यक्ष उपस्थितिभन्दा बाहिरबाट निर्देशन दिने गरेको आरोपसमेत सार्वजनिक रूपमा उठ्ने गरेको छ। केही सर्वसाधारणले अस्पतालमा स्वास्थ्य सेवा व्यवस्थापनभन्दा सुरक्षा व्यवस्थापनलाई बढी प्राथमिकता दिइएको तथा सेवाग्राहीसँगको व्यवहार सन्तोषजनक नभएको गुनासो पनि गरेका छन्।
यद्यपि यी आरोपहरूबारे डा. चितरञ्जन साह वा नारायणी अस्पताल प्रशासनको आधिकारिक प्रतिक्रिया सार्वजनिक भएको छैन। आरोपहरूको स्वतन्त्र पुष्टि पनि हुन बाँकी छ।
यसबीच अस्पताल प्रशासनले घटनाको निष्पक्ष छानबिनमा पूर्ण सहयोग गर्ने प्रतिबद्धता व्यक्त गर्दै नारायणी अस्पतालबाट प्रदान हुने स्वास्थ्य सेवा नियमित रूपमा सञ्चालन हुने जनाएको छ।
