वीरगंज । नेकपा एमालेका नेता तथा पर्साको जगरनाथपुर गाउँपालिकाका पूर्वअध्यक्ष जालिम मियाँका दुई छोरा जाफिर मियाँ मन्सुरी र नासिर अहमद मन्सुरीलाई पुर्पक्षका लागि थुनामा राख्ने आदेश भएको छ। सालीको मृत्यु प्रकरणसँग सम्बन्धित कर्तव्य ज्यान तथा जबर्जस्ती करणी मुद्दामा जिल्ला अदालत पर्साले शुक्रबार यस्तो आदेश दिएको हो।
जिल्ला अदालत पर्साका जिल्ला न्यायाधीश ठाकुरप्रसाद खरेलको इजलास नम्बर ८ ले दुवै दाजुभाइलाई पुर्पक्षका लागि थुनामा राख्ने आदेश दिएको हो। अदालतको अभिलेखअनुसार उक्त मुद्दा २०८३ असोज २२ गते दर्ता भएको थियो।
यस प्रकरणमा समसुल मियाँसहित दुई जना अझै फरार रहेका छन्। मुद्दामा चार जना प्रतिवादी रहेको अदालतको अभिलेखमा उल्लेख छ।
प्रहरीका अनुसार जाफिरलाई बुधबार वीरगंजबाट पक्राउ गरिएको थियो भने उनका दाजु नासिर यसअघि असोज ३ गते पक्राउ परेका थिए।
प्रहरीका अनुसार २०७८ असोज २१ गते जाफिरकी अविवाहित सालीको मृत्यु भएपछि प्रहरीलाई जानकारी नदिई वीरगंज महानगरपालिका–१३ मुर्लीस्थित कब्रस्तानमा शव गाड्ने प्रयास गरिएको थियो। सोही घटनाको अनुसन्धानका क्रममा उनीहरूमाथि कर्तव्य ज्यान तथा जबर्जस्ती करणीसम्बन्धी कसुरमा अनुसन्धान अघि बढाइएको हो।
प्रहरीको प्रारम्भिक अनुसन्धानमा ती महिलामाथि जबर्जस्ती करणी भएको र अत्यधिक रक्तश्रावपछि उपचारका क्रममा मृत्यु भएको आरोप उल्लेख छ। घटनामा संलग्न रहेको आरोप लागेका अन्य व्यक्तिहरूको खोजी भइरहेको प्रहरीले जनाएको छ।
अदालतको आदेशअनुसार जाफिर र नासिर पुर्पक्षका लागि थुनामा रहनेछन् भने फरार रहेका समसुल मियाँसहित दुई जनाको खोजी जारी छ। मुद्दाको अन्तिम फैसला हुन बाँकी छ।
